Moskva civarındaki «Crocus City Hall» kontsert salonında kerçekleşken silâlı ücüm neticesinde, Rusiye Federatsiyası Tahqiqat komitetiniñ malümatına köre, 60-tan çoq insan elâk oldı, 100-den çoq yaralandı. Rusiye prezidenti Vladimir Putin bunı daa izaatlamadı.
Martnıñ 23-nde saba «112» Telegram kanalı menbalarına esaslanıp, elâk olğanlarnıñ sayısı 82-ke arttı, aralarında üç bala bar, dep bildirdi.
Martnıñ 22-nde aqşam kamuflâj urbada bir qaç insan kontsert salonına kirip, avtomatlardan ateş açtı, soñra patlav oldı, küçlü bir yanğın çıqtı. Ateşni söndürmege devam eteler, amma, Moskva vilâyetiniñ valisi Andrey Vorobyevniñ aytqanına köre, «alevniñ büyük qısmı söndürildi». Vorobyev sabağa doğru «Krokusnıñ» seyirci salonına dam tüşti, qurtarıcılar çalışa, dep ayttı.
Vorobyev beş bala olğan 115 insan hastahanege alındı, dep haber etti. Bazıları ağır aldalar.
Rusiye Tahqiqat komiteti terakt maddesine istinaden cinaiy dava açtı. Tünevin Rusiye kütleviy haber vastaları terakttan soñ ücüm etkenler maşinada saqlandı, dep bildirgen edi. Rusiye Federatsiyası Tahqiqat komiteti jurnalistlerniñ ücüm etkenler qayda buluna sualine «şimdilik bir şey aytmaq erte», dep cevap berdi.
Rusiye prezidenti Vladimir Putin ücümni daa izaatlamadı. Rusiye haber agentlikleri oña haber eteler, dep bildire, Rusiye baş nazir muavini Tatyana Golikova yaralanğanlar aqqında esabatqa cevap olaraq Putin «er keske sağlıq tiledi ve ekimlerge teşekkürler bildirdi», dep ayttı.
«Agentstvo» neşiri qayd etkenine köre, «Crocus City Hallğa» qarşı ücüm – 2004 senesinden berli 300-den çoq insan elâk olğan Beslan mektebindeki ücüm vaqtından Rusiyede eñ büyük terakttır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
