Rusiye Tahqiqat komiteti Rusiyede olğan «terror ücümlerinde» Ukrayınanıñ arbiy reberlik vekillerini qabaatladı.
Ukrayına Mudafaa nazirliginiñ Baş istihbarat idaresiniñ reberi Kırılo Budanov, Ukrayına Silâlı quvetlera Ava quvetleriniñ komandanı Mıkolay Oleşçuk, Ukrayına Silâlı quvetleri Arbiy deñiz quvetleriniñ komandanı Oleksiy Neijpapa ve Ukrayına Arbiy ava quvetleriniñ uzaqtan idare etilgen uçuş cihazları 383-ünci ayrı polkunıñ komandanı Serğiy Bürdenükni ğıyabiy şekilde qabaatladı.
Rusiye tahqiqatçıları 2022 senesi aprel ayından 2023 senesi sentâbr ayına qadar Rusiye regionlarına qarşı kerçekleştirilgen yüzden çoq uçucısız ücüminiñ teşkil etilüvi ve yapıluvına bu Ukrayına arbiyleriniñ alâqası bar olğanını isbatlağan yeterli delil topladı, dep bildire.
Yaqın vaqıtta Rusiye Tahqiqat komiteti «olarnı qıdıruvğa ilân etip, apis cezası şeklinde sıñırlav tedbirini belgilemege» planlaştıra.
Bir buçuq yıl devam etken cenk vaqtında Rusiye akimiyeti Rusiye regionlarına qarşı uçucısız ücümi aqqında 500 kereden çoq bildirdi, dep saydı RBK neşiri. Yıqılğan binalar ya da yaralanğanlar aqqında 110 haberde aytıldı.
Rusiyeniñ regional akimiyet ücümler Ukrayına tarafından yapıla, dep ayta. Kyiv bu malümatnı izaatlamay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
