Ukrainada fevral 26-sında qayd etilgen “Qırımnıñ Rusiye işğaline qarşı tirenüv künü”nde, “Strategiya-18” faalcileri Moskova soqaqlarına bir kişilik piketnen çıqtı. Öz plakatlarınen olar, “rusiyelilerge, ilhaq etilgen Qırımda qırımtatar ve ukrain faalcilerniñ kerçek alı aqqında hatırlata”. Bu aqta Qırım.Aqiqatqa aktsiya iştirakçisi Vera Levreşina aytıp berdi.
Plakatlarda: “Biz eyi devlet degilmiz. Qırım işğali - Rusiye masharılığı”, «Crimea is Ukraine. Russia out», “Fevral 26-sı - Qırımtatarlarnıñ RF işğaline qarşı tirenüv künü”, “Qırım - bu Ukraina” ve ilâhre.
İştirakçilerniñ birisi qırımtatar bayrağınen edi.
Sankt-Peterburg ve Moskvadan olğan Rusiye faaliyetçileri, qırımtatarlarnıñ 1944 senesi mayıs 18-de sürgün etilüvi hatırasına «Strategiya-18» adlı muddetsiz tedbir içün birleştiler. Er aynıñ 18-nci kününde faaliyetçiler, ilhaq etilgen Qırımdaki vaziyet aqqında ikâye etmek ve Rusiye cemaatçılığına insan aq-uquqları ve ürriyetleriniñ bozuluvı vaqiaları aqqında haber bermek içün şeerniñ soqaqlarına çıqalar.
2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarı olğanlar, hususan «Rus birligi» firqası çıqtı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
