Moskovada mustaqil namzetlerniñ Moskova şeer dumasına saylanmaq imkânını talap etken izinsiz aktsiyalarda, adamlar tutulıp başlandı. Puşkinskaya meydanında polis, 10-dan çoq adamnı avtozaklarğa aldı, dep bildire Azatlıq Radiosı.
Avgustnıñ 3-ünde aktsiya "bulvar kezintileri" şeklinde keçirildi. Onıñ başlanmasından bir qaç saat evel, Bulvar tögereginde politsiya ve Rosgvardiya hadimleri nevbetçilik yapıp başladı.
Aktsiya başlağanından soñ tezden, politsiya, vesiqa teşkergende, bir qaç adamnı tutıp aldı.
Trubnaya meydanında yüzden çoq adam toplandı. OMON, olardan Sadovoye tögeregine çekilgenlerini ve yürmekke keder etmegenlerini talap etip, kenarğa sıqıştırdı.
Bundan evel bildirile edi ki, Rusiye politsiyasınıñ hadimleri, metro stantsiyası yanında adamlarnıñ vesiqalarını teşkere edi ve "çalqantılar"da iştirak etmekten saqındıra edi.
İyül 27-sinde Moskovada Moskova şeer duması saylavlarına mustaqil mabuslarnıñ iştirak etmek içün yiberilmesini talap etken izinsiz aktsiya keçti. Uquq qoruyıcılarğa köre, aktsiyada politsiya ve Rosgvardiya 1373 adamnıtutıp aldı, olardan 200-den ziyadesi geceni politsiya bölüklerinde keçirdi. Narazılıq iştirakçilerniñ 70-den ziyadesi yaralandı.
