Link açıqlığı

Saatnıñ esas haberi

Moskova SİZOsında bir yıl: qırımtatar iş adamı evge qayttı


2018 yılı baarde Qırımda tevqif etilgen ve Moskova SİZOsına avuştırılğan qırımtatar iş adamı Resül Velillâyev, yarımadağa qayttı.

Bu hususta onıñ advokatı Cemil Temişev bildirmekte.

"Daa bir basamaqnı keçtik. Resül ağanıñ adından bu davanıñ siyasetleştirmesinden vazgeçmege er keske rica etem", - dep yazdı advokat Facebookta.

Velillâyevniñ Qırımğa qaytması içün onıñ Facebook saifesinde de haber ettiler.

"Bir yıldan çoq o tuvğan toprağına ayaq basmadı, deyerlik qorantası ve yaqınlarınen körüşmedi, amma bugün o kene Vatan avasınen nefes aldı!", - denile beyanatta.

İyül 25-inde Temişev, 2018 yılı Velillâyevnen beraber apis etilgen Ali Bariyevniñ Qırımğa qaytmasını haber etken edi.

İş adamı Resul Velilâyev ve «KrımOpt» şirketiniñ müdiri Ali Bariyev 2018 senesi aprelniñ 26-nda Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tintken soñ tutulğan edi.

Daa soñra Velilâyev 2 ayğa tevqif etilerek, Moskvadaki Lefortovo tahqiqat izolâtorına (SİZO) qapatıldı. Qırımda oña qarşı Rusiye Ceza kodeksiniñ 238-inci maddesiniñ 2-nci qısmına istinaden («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca dava açıldı.

Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları bar olğanından şübheli sayılğan musulmanlarnıñ evlerinde sıq-sıq tintüvler keçirilip başladı.

XS
SM
MD
LG