Moskovada Arbatta Qırımnı işğalden boşatmaqnı ve Ukraina deñizcilerni azat etmesini talap etken ve qırımtatarlarğa qol tutqan "Strategiya-18" Rusiye teşebbüs gruppasınıñ bir kişilik piketleri keçti. Bunı Qırım.Aqiqatqa teşebbüsniñ iştirakçisi, Rusiye faali Vera Lavreşina aytıp berdi.
"(Qomşu Rusiyeniñ - QA) Paytaht sakinlerinen Qırımnıñ qaytarılması aqqında dialog qurmaqtan ümüdimizni kesmeymiz. Eñ azından, qanun boyunca Qırımnı Ukrainağa ve, müim ki, qırımtatarlarğa qaytarmaq kerek olğanını bizden bilip, endi yumruqlarnen atılmaylar. Bu özgün ve cesür halqnı qurtarmaq içün qırımtatar cumhuriyeti kerek. Biz, ağır hasta Edem Bekirov ve Pavlo Ğrıb içün, Ukraina deñizcileri ve "Sentsov cedveli"niñ mabüsleriniñ azat etilmesi içün fleşmobnı devam etemiz. Maqsadımızğa irişmegence yapacaqmız. Ukrainağa şan-şerefler! Biz ğalebege inanamız", - dedi Levreşina.
O, Moskovada keçken kütleviy aktsiyalardan soñ, olarğa qarşı quvetçilerniñ diqqatı orta qararda edi, dep qoştı.
"Cumaertesi kezintileride moskovalılarnıñ kütleviy dompuzlamasından soñ, politsiyanıñ mubasebeti yımşandı. Elbet, Arabat yol çapraında bir qaç devriye maşnası nevbetçılik yaptı. Amma "kosmonavtlar" (OMON hadimleri - QA) körünmey edi. Bizni izlegen, tutqan, urğan kimse yoq edi", - dep qoştı faal.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
