"Strategiya-30" rusiye teşebbüs gruppasınıñ faalleri tünevin Moskovada Eski Arbatta adet olğan er aylıq Rusiyede apis etilgen ukrainlerge qol tutuv piketlerini keçirdi.
Bu sefer piketçiler, ukrain rejissörı Oleğ Sentsovnnı, Qırımdan ukrain faali Volodımır Baluhnı, "Hizb ut-Tahrir davası"nıñ iştirakçilerini añdı, dep bildire Qırım.Aqiqatqa teşebbüs iştirakçisi, rusiye faali Vera Lavreşina.
"Eski Arbatta, belli olğanı kibi, er kes bir işnen meşğul: kim yırlay, kim bir şeyni reklama ete. Biz de azatsız memlekette azatlıq ğayelerini reklama etemiz. Amma şimdilik, doğrusını aytqanda, daa pek muvafaqiyetli degilmiz", - dey Lavreşina.
Hususan, faaller "Qırım - qırımtatarlarğa" yazısınen plakatlarnı tuta edi.
Piketçiler qayd etkeni kibi, bu sefer polis tarafından olarğa itirazlar olmadı.
"Strategiya-30" aktsiyası çerçivesinde rusiye mahalefet faalleri er aynıñ 30-ında "Siyasiy mabüs künü"ni keçire. Olar, siyasiy mabüslerni azat etmek, Ukrainağa qarşı Rusiye tecavuzını toqtatmaq ve Qırımnı işğalden boşatmaq talaplarınen silâsız piketler ve aktsiyalarğa çıqa.
