Moskova şeer mahkemesi, iyül 11-inde Rusiye Yuqarı mahkemesi yanında keçirilgen aktsiya içün cöremelengen qırımtatarlarnıñ apellâtsiya şikâyetlerini baqıp başladı.
Avgustnıñ 26-sında, apellâtsiya, Moskovanıñ Taganskiy rayon mahkemesiniñ qararını amelde qaldırdı. Böylece, aktsiyanıñ dört iştirakçisi Rustem Tairov, Aleksandr Gavrikov, Zinur Appazov ve Nariman İbraimovnıñ para cezaları ödelmeli. Bunı Qırım.Aqiqat mühbirine advokat Konstantin Andreyev aytıp berdi.
"Moskovada iyül 11-inde Yuqarı mahkeme yanında tutulğan 48 adamnıñ apellâtsiyası baqılıp başladı. Bugün dörtüniñ şikâyetleri baqıldı. Moskova şeer mahkemesi, Taganskiy mahkemesiniñ qararını tasdıqladı, er iştirakçi 20 biñer ruble tölemeli. Bu şahıslarnıñ evel memuriy mesuliyeti olmağanını degenime, mahkeme diqqat etmedi. Mahkemeci, közlerini tavanğa köterip: "Olar qabaatını tanımasa, tolusınen ödesinler" dedi", - aytıp berdi advokat.
Başqa apellâtsiya şikâyetleriniñ baqılması sentâbr 17-sinde yapılacaq.
Moskvada iyülniñ 11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.
Uquq qorçalayıcı Lutfiye Zudiyeva, Qırımda cezalanğan faalleriniñ cöremelerini ödemek içün «Qırım marafonı» cemaat teşebbüsi çerçivesinde para toplamağa başladılar, dep bildirgen edi.
