Rusiye insan aqları vekâletlisi Tatyana Moskalkovanıñ fikirince, Rusiye ve ilhaq etken Qırımnıñ oquv yurtlarında depressiyada bulunğan ve istilâ ete bilecek gençlerni tapmaq içün mektep talebeleri ve studentlerniñ içtimaiy ağlardaki saifelerini talil etecek mütehassıs vazifesini kirsetmek kerek.
«Mence, bugünki künde mektepte psiholog degil de, içtimaiy ağlardaki iş mütehassısınıñ olması daa müim. Bugünde-bugün epimiz içtimaiy ağlardamız – ıntıluv, problem, bahtsızlıqnen. Depressiyada bulunğan, bir özü olğan mektep talebesi, studentni körgen mütehassıs yardım köstermeli», – dep bildire Moskalkovanıñ aytqanlarını TASS.
Rusiye ombudsmeniniñ fikirince, bu tedbir Keriçteki facianıñ tekrarlamamasına yardım eter.
Moskalkovanıñ qayd etkenine köre, Keriçteki faciadan soñ o, Qırımnıñ Rusiye yolbaşçısı Sergey Aksenov ve Rusiyeniñ bala ombudsmeni Anna Kuznetsova deputatlarğa oquv yurtlarındaki telükesizlikni temin etecek tekliflerni azırladı.
«Amma, ne yazıq ki, bu meselede teşkiliy iş pek yavaş yapıla. Amma bu problemler aktual olıp qala», – dedi o.
Moskalkovanıñ bildirgenine köre, olar mektep qaravulınıñ seviyesini arttırmağa teklif etip, Rusiye gvardiyasına kirgen qaravulnıñ müessise saylanğan yarışta üstün olsun istedi. Bundan ğayrı, tasil müessisesine talebege silâ izni berilgenini bildirmege teklif etildi.
2018 senesi oktâbrniñ 17-nde Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik kollecinde olğan patlavnı terror ücümi olaraq tasnif ete.
