Moldovada ilk COVID-19 koronavirus hastalığı adisesini tasdıqladılar.
Moldova Sağlıq Nazirligi, virus, İtaliyadan qaytqan 48 yaşındaki qadında tapılğanını haber ete Azatlıq Radiosı.
"Qadınnı ava limanından eki taraflı pnevmoniyanen, sıcağınen, öksürik ve alsızlıqnen alıp kettiler", - Moldova Sağlıq Nazirliginde qayd ettiler.
Qayd etkenine köre, qadın İtaliyada fevralniñ 28-inde hastalandı ve hastahanege qoyuldı, amma "öz başına hastahaneden ketip, uçaqqa oturıp, evge qayttı".
Martnıñ 6-sında dünyada COVID-2019 koronavirusnıñ yaratqanı yoqulama allarınıñ sayısı 100 biñden ziyade oldı.
Martnıñ 3-ünde Ukrainada ilk COVID-19 koronavirus hastası qayd etildi.
Daa evel Rospotrebnadzorda haber ettiler ki, Qırım ve Aqyarda umumen 58 adam nezaret altında buluna.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
