Ukraina Tış işler naziri Dmıtro Kulebanıñ fikirince, yañı saylanğan prezident Mayya Sandu yolbaşçılığında Moldova halqara meydançıqlarda Qırım teşebbüsleriniñ ilerilevinde ortaq olacaq. Bu aqta nazir Qırım.Aqiqatqa bildirdi.
«Artıq Qırımdaki adise-vaqialarnı tasnif etken ve halqara alanda Qırımnen bağlı teşebbüslerni ileri sürecek qomşumız bar», – dep ayttı Kuleba.
Onıñ qoşqanına köre, Qırım ve Pridnestrovye meselesi halqara toplulıq tarafından er daim muzakere etilecek.
«Qırım ve Pridnestrovye meselesi halqara alanda daima bayağı sesli yanğıradı. Hususan Qırım meselesi. Bu problemni köterüvde ilâve ortağımız, ilâve ittifaqdaşımız olacaq, dep aytar edim. Yani kene de sesli yanğıracaq, amma daa bir iştirakçi qoşulacaq», – dep qayd etti Ukraina Tış işler naziri.
Daa evel Mayya Sandu «Yevropeyska pravda» içün intervyü berip, Ukraina topraq bütünligini ürmet ete ve Qırımnı Ukrainanıñ bir parçası dep saya, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
