Ukrayin tele alıp barıcısı ve Boliviya asıllı yırcı Mişel Andradu «Serbest Qırımğa mektüpler» teşebbüsi çerçivesinde Rusiye uquq qoruyıcıları tarafından tutulğan «Qırım birdemligi» cemaat teşkilâtınıñ faali ve ATR qırımtatar telekanalınıñ sabıq hadimi Rustem Osmanovnıñ mektübini oqudı.
Video Ukrayina prezidentiniñ Qırım Muhtar Cumhuriyetindeki temsilciliginiñ içtimaiy ağlarında derc etildi. Oqulğan mektüp Osmanovnıñ qartbabasına yazılğan ve 2024 senesi martnıñ 24-nde edi, Rustem apiske alınğanından aman-aman 20 kün keçken soñ.
«Biz adaletsizlikke oğradıq. Biz bu sınavdan Allahnıñ yardımınen keçip, daa küçlü ve qaviy olacaqmız», – dep yazılğan Osmanovnıñ mektübinde.
2024 senesi martnıñ 5-nde saba Qırımda qırımtatarlarnıñ evlerinde kütleviy tintüvler keçirildi. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Rusiye uquq qoruyıcıları martnıñ 5-nde tutulğan bütün qırımtatarlarnı Rusiyede terrorist olaraq tanılğan, amma bir çoq memlekette qanun çerçivesinde faaliyet köstergen «Hizb ut-Tahrir» teşkilâtında iştirak etkeninde qabaatladılar.
Noyabr ayında belli oldı ki, Rustem Osmanov, Memet Lümanov ve Mustafa Abduramanovnı Rostov-na-Donu şeerindeki SİZO-1-ge alıp kettiler, bundan evel olar Aqmescitteki SİZO-2-de ediler.
«Serbest Qırımğa mektüpler» aktsiyasınıñ maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek. Bundan ğayrı, mektüpler Rusiye apishaneleriniñ memuriyetleri içün bir işaret ola, er bir Ukrayina vatandaşı müim, cemiyet ise tutuv şaraitlerini közete, dep köstere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
