Lvivde martnıñ 9-nda milliy rekord qoyuldı – Taras Şevçenkonıñ eseri eñ kütleviy şekilde icra etildi. Bu aqta Azatlıq Radiosınıñ mühbiri haber ete.
Lviv vilâyetiniñ 30-dan ziyade taqımından 407 bandurist Kobzarnıñ abidesi ögündeki meydanda «Vasiyet» («Zapovit») ve «Reve ta stogne…» yırlarını beraber icra etkenler. Tedbir ukrain şairi ve ressamı doğğanınıñ 205 yılına bağışlandı.
«Mında bediiy müessise ve başlanğıç mekteplerniñ çeşit taqımları toplaştı, tecribeli icracılar da bar. Er keske haber etildi, istegi olğanlar qoşuldı. Banduranı ögrenmege başlağan balalar da bu bediiy tedbirde iştirak ete», – dep tarif etti Mıroslava Turkalo, Lviv vilâyetiniñ devlet memuriyetindeki medeniyet, millet ve din meseleleri departamentiniñ yolbaşçısı.
Daa evel Hersonda 130 bandurist Kobzarnıñ eserlerini icra etip, milliy rekord qoyğan edi.
Ukrainada martnıñ 9-nda ukrain şairi ve ressamı Taras Şevçenko doğğanınıñ 205 yılı qayd etile.
Taras Şevçenko işğal etilgen Qırımda da añıldı. Yalta ve Aqyarda şeer sakinleri Kobzarnıñ abidesine çeçek ketirdi. Aqmescitte Rusiye tarafdarları da çeçek qoydı.
Taras Şevçenko 1814 senesi martnıñ 9-nda dünyağa kelip, edebiyat ve ressamlıq icadı sayesinde meşur oldı. O, ukrain medeniyetiniñ eñ büyük timsallerinden biri ola.
