Qırım Muhtar Cumhuriyeti ve Aqyar Prokuraturasınıñ reberligi altında Rusiye kontrolindeki Qırım Yuqarı mahkemesiniñ üç qadısına qarşı qabaatlav aktı mahkemege yollanıldı. Bu qadılar Qırımtatar Milliy Meclisiniñ liderlerinden biriniñ taqip etilüvinen bağlı.
Bu aqta Qırım Muhtar Cumhuriyeti Prokuraturasınıñ matbuat hızmeti bildire.
«Tahqiqat malümatına köre, «qadılar» Qırımtatar Milliy Meclisiniñ reberlerinden biriniñ 2014 senesi fevralniñ 26-nda olıp keçken adise-vaqialar sebebinden qanunsız cinaiy taqip etilüvi ve mahküm etilüvinen bağlı. Qabaatlanğanlar işğalci devletniñ yarımada işğaline razı olmağan Ukraina vatandaşlarını taqip etüv siyasetini yerine ketirdi. 1949 senesiniñ Cenk vaqtında vatandaşlarnı qoruv şartnamesiniñ maddelerini ihmal etip, olar yarımadada Rusiye Federatsiyası olmağan vaqıtta olıp keçken vaqialarnı tasnif etmek içün RF qanunlarını qanunsız qullandı», – dep aytıla haberde.
Bu qadılar Ukraina Ceza kodeksiniñ 438-inci maddesiniñ 1-inci qısmına (cenk qanunları ve adetlerini bozuv) istinaden qabaatlana. Bu maddege köre 12 yılğa qadar apis cezası berile bile.
Qırım Muhtar Cumhuriyetiniñ Prokuraturası qabaatlanğanlarnıñ ad ve soyadlarını bildirmey, amma müessisede haberdar olğan menba Qırım.Aqiqatqa Zinkov Viktor İvanoviç, Krüçkov İgor İgoreviç ve Kozırev Aleksey Viktoroviç aqqında aytıla, dep bildirdi. Olarnıñ Qırımtatar Milliy Meclisiniñ reis muavini Ahtem Çiygozğa çıqarılğan qararğa alâqaları bar.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti.
2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı ve İlmi Umerovnı azat etip, Türkiyege teslim etti. Daa soñra olar Kyivge keldi.
2020 senesi fevral ayında Qırım Muhtar Cumhuriyetiniñ Prokuraturası Qırımtatar Milliy Meclisiniñ reis muavini Ahtem Çiygoznı 2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde qalabalıqlarnı teşkil etkeninde qabaatlap taqip etken 25 şahısqa şübheli olğanını ilân etti.
