Qırımtatar Milliy Meclisiniñ liderleri, Qırımnıñ sabıq memurı Faruh Kamalovnı 5 yılğa üküm eterek, 3 yıl sınav müddetini berip, Rusiye işğal etken Qırımğa qaytmasına yol açqan Ukraina mahkemesiniñ qararınen razı degil.
Milliy Meclis reisiniñ muavini Ahtem Çiygoz, sabıq memurnıñ taqiqat ile işbirligi yapması ve qabaatını tanıması azat etilmesi içün yeterli bir sebep olmağanını tüşüne.
«Onıñ (Kamalov – QA) kibi insanlar Qırımda arbiy işğalge yardım etkenler, yüzlernen vatandaşımıznıñ ayatını telükege oğratqanlar. Bu pezevenk ve aşaa adamlar sebebinden olar (işğalge qarşı çıqqanlar – QA) apiste yata, balalar aydutlar tarafından qaçırıla, qorantalar işğalci akimiyetniñ basqısı altında buluna… Bu añlaşmanı (qabaatını tanığanına dair – QA) imzalaması yeterli degil», – dep ayttı Çiygoz Qırım.Aqiqatqa.
Milliy Meclis reisiniñ muavini qayd etti ki, Kamalov, onıñ areketlerini «yüzlernen insannıñ ayatlarını telükege oğratması» olaraq tanığan Ukraina Ceza kodeksiniñ daa sert bir maddesine köre qabaatlanmalı.
Milliy Meclis reisi Refat Çubarov, Ukraina mahkemesiniñ Kamalov qararını Qırım.Aqiqatqa izaatlap, «bunıñ kibi maddeler deñiştirilmeli» dedi.
Daa evel belli olğanı kibi, Ukraina topraq bütünligine qast etkeninde qabaatlanğan Qırımnıñ Rusiye sport naziriniñ sabıq muavini Faruh Kamalov taqiqat ile işbirligi yapmağa razı olıp, qabaatını tanığanına dair añlaşma imzaladı. Soñra esas Ukrainanı terk etip, Qırımğa qaytıp oldı.
Mahküm etilgen memurnıñ ükümnen bağlı izaatları şimdilik olmadı.
Fevralniñ 2-nde «Kalançak» keçiş noqtasında Ukraina havfsızlıq hızmetiniñ hadimleri Qırım sport naziriniñ sabıq muavini Faruh Kamalovnı yaqalağan edi. UHH spikeri Yelena Gitlânskayanıñ bildirgenine köre, yaqalanğan kişi esas Ukrainağa kelip, çetel biometrik pasportını alacaq edi.
Qırım Muhtar Cumhuriyetindeki Ukraina havfsızlıq hızmeti Baş idaresiniñ taqiqatçıları cinaiy iş açqan soñ Kamalov nezaret altına alınğan edi.
İyünniñ 14-nde QMC prokuraturası Kamalovğa nisbeten qabaat aktını mahkemege yollağan edi.
