Milliy exit poll aprelniñ 21-nde Ukraina prezidenti saylavları kününde saylav bölükleriniñ çıqışında keçirilgen sorav neticelerini çıqarıp, saat 20:00-da olğan malümatnı aydınlattı.
Yañartılğan malümatqa köre, Volodımır Zelenskıyge saylayıcılarnıñ tam 73%-ı qoltuttı, şimdiki prezidenti Petro Poroşenkoğa – 25,5%-ı. Saylav bölükleri qapatılğan soñ birden aydınlatılğan neticelerde Zelenskıynıñ reyleri 0,2% çoq edi, Poroşenkonıñ ise o qadar az edi, dep haber ete Azatlıq Radiosı.
Aprelniñ 21-nde saat 20:00-da olğan malümatqa köre, Ukraina prezidenti saylavlarınıñ ekinci turında saylayıcılarnıñ 61,68%-ı rey berdi, bunı Ukraina Merkeziy saylav komissiyasınıñ saytında aydınlatılğan 199 territorial saylav bölgesinden 52-siniñ malümatı tasdıqlay.
Daa evel şimdiki prezident Petro Poroşenko raqibi Volodımır Zelenskıynı saylavlardaki ğalebesi ile tebriklemege azır olğanını bildirdi.
Milliy exit poll-2019 İlko Kuçeriv «Demokratik teşebbüsler» fondu, Kyiv içtimaiyat halqara institutı ve Oleksandr Razumkov Ukraina siyasiy ve iqtisadiy tedqiqatlar merkezi tarafından keçirildi.
Aprelniñ 21-nde Ukraina vatandaşları öz prezident namzetine qoltuttı. Saylav bölükleri saat 8:00-da açılıp, 20:00-da qapatıldı.
Birinci turda Volodımır Zelenskıyge 5 714 034 saylayıcı (30,24%), Petro Poroşenkoğa ise 3 014 609 (15,95%) saylayıcı qoltuttı. Rey berüvde saylayıcılarnıñ 62,8%-ı iştirak etti.
