Link açıqlığı

Saatnıñ esas haberi

«Milliy batalyonda» iştirak etkeninde qabaatlanğan qırımlı FSB basqısı altında malümat berdi – advokat


Advokat Ayder Azamatov
Advokat Ayder Azamatov

«Ukraina milliy batalyonında» iştirak etkeninden şübheli olğan qırımlı Mecit Ablâmitov «maneviy-psihologik basqı» altında malümat berdi, dep bildirdi Qırım.Aqiqatqa advokat Ayder Azamatov.

Onıñ aytqanına köre, Ablâmitovnıñ evinde tuvğanlarınıñ iştiraki ile üç tintüv keçirildi.

«Birinci tintüv qardaşınıñ iştiraki ile oldı, soñra onı politsiya bölügine alıp ketip yibergenler. Ekinci tintüvde Mecit Ablâmitov bar edi. Soñra onı politsiyağa alıp, FSB hadimlerine teslim etkenler. Üçünci tintüvni ise FSB hadimleri keçirdi. Vesiqada bir tintüv olaraq aytıla, tintüv protokolı bar, amma aslında üç tintüv oldı», – dep tarif etti Ayder Azamatov.

Advokat, FSB binasında Mecit Ablâmitovğa basqı yapıldı, dep tahmin ete.

«O, özüni degil, soy-soplarını tüşündi. Anası hasta. Maneviy olaraq pek yaramay edi. Mecit Ablâmitov qabaatlav manasını añlamayıp, bergen malümatnıñ aqibetlerini bilmey edi. Yani batalyonda silâsı bar edi sanki. O, batalyonda olğanını inkâr etmey, amma silâsı yoq edi, bir talim olmadı», – dep qayd etti Azamatov.

Advokatnıñ aytqanına köre, ilk tahqiqat soñuna kele. Davanı Qırımnıñ Rusiye kontrolindeki İslâm Terek rayon mahkemesi baqacaq.

«Tahqiqatçı, ilk tahqiqat yekünlendi, dep bildirdi. Cinaiy davanıñ bütün malümatlarını berdi. Tanış oldıq, Mecit Ablâmitov da tanış oldı. Büyük ihtimalnen, bu afta, belki, kelecek afta, prokuratura tasdıqlağan soñ maña ve müvekkilime qabaatlayıcı qarar berilecek ve mahkemege yollanılacaq», – dep bildirdi advokat.

Qırımdaki Rusiye FSBsiniñ idaresi advokatnıñ malümatını açıq şekilde izaatlamadı.

Avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.

Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.

Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.

Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.

Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.

«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.

XS
SM
MD
LG