Rusiye nazirler şurası «Qırımnı suvnen temin etüv planını» azırladı, oña 50 milliard ruble berilecek. Bu aqta Rusiye baş naziri Mihail Mişustin muavinleri ile keçirgen toplaşuvda ayttı.
Onıñ bildirgenine köre, plan 14 tedbirden ibaret, yañı suv çoqraqlarınıñ açılması da bar.
«Plannı yerine ketirmek içün 50 mlrd ruble berilecek, büyük qısmı – federal bücetten. Bu künde eñ az 310 biñ kubometr suv berecek, yarımada ve sakinleri keyfiyetli suvnen temin etilecek», – dep bildire Mişustinniñ aytqanlarını TASS.
Mişustin, Rusiye ükümeti Qırım ve Aqyarnıñ suv problemlerini çezmek içün 5 mlrd ruble ayırıcaq, dep haber etken edi. Rusiye ükümeti bergen 5,8 mlrdniñ büyük qısmı Aqyarğa ketecek.
Aqmescitte, Bağçasaray ve Aqmescit rayonlarında qurğaqlıq ve suv azaluvı sebebinden üçünci eñ sert suv berüv sıñırlarını kirsetkenler. Aqmescit akimiyeti suv berüv cedveline riayet etilmeycek, dep tenbiledi.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
