Lipetskaya vilâyetiniñ apishanesinde qırımtatar siyasiy mabüsi Ruslan Mesutovnıñ Quranı tutıp alındı, dep haber ete «Qırım birdemligi».
«Mesutovnıñ arapça Quranı alındı, mütehassıs «ekstremistmi», «normal Quranmı» baqacaq eken. O vaqıttan berli, noyabr ayından, onı keri alıp olamay, bu da onı pek qıynay», – dedi advokatı Vladimir Bilenko.
Qayd etilgenine köre, 2022 senesi noyabr ayından berli qırımlınıñ aş qıyınlıqları bar edi, çünki aşlarda domuz eti çoq qullanıla. Ruslan Mesutov böyle aşlar aşamay. Bu apishanede yatqan musulmanlar memuriyet adına muracaatta bulundı, lâkin aş meselesi öyle de çezilmedi.
Teşkilât qayd etkenine köre, siyasiy mabüs diger qırımlı musulman – siyasiy mabüs Lenur Seydametovnen aynı kamerada buluna.
2019 senesi iyünniñ 10-nda Rusiye işğal etken Qırımda dört qırımtatar musulmannıñ evinde OMON hadimleri, Rusiye mahsus hızmetleri ve ekstremizm ile küreş merkezi hadimleriniñ iştirakinen kütleviy tintüvler keçirildi.
Aluştada Rusiye uquq qoruyıcıları cami imamı vazifelerini eda etken Ruslan Nagayev ve iş adamı Eldar Kantimirovnı tuttı. Büyük Lambat (Malıy Mayak) köyünde Ruslan Mesutov, Körbek (İzobilnoye) köyünde ise Lenur Halilov tutuldı. Mesutov ve Halilov yerli din cemiyetiniñ reisleri edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
