Merkeziy saylav komissiyası, Rusiyede aprelniñ 5-nden iyünniñ 21-ne qadar keçirilecek olğan bütün saylav kampaniyaları, regiondaki saylavlar ve referendumlarnı koronavirus sebebinden başqa vaqıtqa qaldırmağa qarar aldı. Umumen qırğınlıq sebebinden 94 saylav kampaniyası, hususan Putinniñ Rusiye Anayasası tüzetüvlerine rey berüv, başqa vaqıtqa qaldırılacaq, dep bildire «Nastoyaşçeye Vremâ».
«Memleketteki vaziyetni köz ögüne alıp ve vatandaşlarnıñ sağlığı ve telükesizligini temin etmek maqsadınen yaqın aylarda keçirilecek olğan bütün saylavlarnı ve referendumlarnı memlekette epidemiologik vaziyet eyileşkenine qadar qaldırmağa doğru olur dep tüşünemiz», – dep bildirdi Merkeziy saylav komissiyasınıñ yolbaşçısı Ella Pamfilova.
Daa evel Rusiye prezidenti Vladimir Putin saylav komissiyalarına fevqulâde vaziyette ya da yüksek seviyeli azırlıq rejiminde saylavlarnı ve referendumlarnı başqa vaqıtqa qaldırmaq aqqını bergen qanunnı imzaladı. Rusiyede fevqulâde vaziyet ilân etilmedi, amma, vesiqağa köre, yüksek seviyeli azırlıq rejimi memleketniñ bir qaç regionında ilân etilgen olsa, Rusiye Merkeziy saylav komissiyasınıñ rey berüvni başqa vaqıtqa qaldırmaq aqqı bar.
Aprelniñ 22-nde bütün Rusiye sakinleri Anayasa tüzetüvlerine rey bermek kerek edi.
İnsanlar bir kereden bütün tüzetüvlerge rey berecek edi, ya bütün deñişmelerge qol tutacaqlar, ya da qarşı çıqacaqlar. Memleketniñ esas vesiqasında eñ çoq qavğa çıqarğan tüzetüvlerden biri Putin saylanması müddetleriniñ sıfırlanmasınen bağlı edi. Onıñ 2036 senesine qadar memleketniñ reberi vazifesine namzet köstermek ve bu vazifege saylanmaq imkânı ola bile.
