«Şimaliy aqım-2» leyhası qurıp bitirilgen taqdirde bile Ukraina tranzit memleket olaraq qalacaq. Bunı Berlinde brifing vaqtında Almaniya kantsler Angela Merkel bildirdi.
«Ukraina üzerinden gaz tranzitiniñ qalmasını temin etmek isteymiz. Kelecekte, "Şimaliy aqım-2" leyhası qurıp bitirilgen taqdirde bile bizim içün Ukraina tranzit memleket olaraq qalacaq. Ukraian tarafından büyük qorqu bar. Bu qorqularnı ciddiy qabul etemiz. Bu mevzunı bugün aqşam ve kelecekte muzakere etecekmiz», – dedi o.
Onıñ qayd etkenine köre, gaz hattısı meselesi ABD-ne ziyareti vaqtında da kün tertibinde olacaq.
Volodımır Zelenskıy de «Şimaliy aqım-2» leyhasınıñ quruluvını tefsir etti.
«Bunıñ iqtisadiy bir leyha adı altında ustalıqnen gizlengen büyük bir telüke olğanına inanamız. Bugün Ukrainanıñ Avropağa gaz naqil marşrutı kerçekten emiyetli bir maniadır. "Şimaliy aqım-2" bütün bölge içün büyük telüke yarata. Bunıñ daa bir isbatı da Rusiye ordusınıñ devlet sıñırımızda yerleşmesidir», – dedi Zelenskıy.
«Şimaliy aqım-2» (Nord Stream-2) leyhası gaznı Rusiyeniñ şimalindeki yataqlardan, Ukraina ve Poloniyadan keçken ananeviy tranzit marşrutlarını çette qaldırıp, Baltıq deñizniñ tübünden doğrudan Almaniyağa alıp barıp teslim etecek. Leyha, artıq qurulğan birinci «Şimaliy aqım»nıñ imkânlarını kenişletecek.
Avropa komissiyasında, «Şimaliy aqım-2»niñ qurulması taqdirde şeffaflıq, diskriminatsiyanıñ olmaması ve musaviy irişüv printsipleri bozulacaq, dep bildirdiler.
