Link açıqlığı

Saatnıñ esas haberi

Merkel Rusiyeden ukrainalı deñizcilerni azat etmesini talap ete


Ukraina prezidenti Petro Poroşenko ve Almaniya kantsleri Angela Merkel
Ukraina prezidenti Petro Poroşenko ve Almaniya kantsleri Angela Merkel

Almaniya kantsleri Angela Merkel Ukraina prezidenti Petro Poroşenko ile körüşip, Rusiyeden 2018 senesi noyabr ayında zapt etilgen ukrainalı deñizcilerni azat etmesini ve Keriç boğazında gemi keçişiniñ telükesizligini kefil etmesini tekrar talap etti. Bu aqta Azatlıq Radiosı bildire.

«Daa bir kere bu deñizcilerniñ azat etilmesini ve Ukraina gemileriniñ Keriç boğazından serbest keçmesini talap etem. Mariupol – Ukraina içün müim bir şey, kiriş olmalı», – dedi Merkel.

Ukraina prezidenti Petro Poroşenko Almaniya kantsleri Angela Merkel ile körüşip, 2018 senesi noyabr ayında Qırım yalısında FSB tarafından zapt etilgen ukrainalı arbiy deñizcilerni azat ettirmek içün Rusiyege yapılacaq basqını muzakere etti. Bu aqta Ukraina devlet yolbaşçısı aprelniñ 12-nde Twitterde bildirdi.

2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG