Almaniya kantsleri Angela Merkel cumaertesi künü, yanvarniñ 11-nde, Moskvağa Rusiye prezidenti Vladimir Putinnen muzakere keçirmege keldi, dep bildire Rusiye kütleviy haber vastaları.
Kreml, yanvarniñ 11-nde keçirilecek körüşüv «Suriye ve Libiyadaki vaziyet, Yaqın Şarqtaki vaziyet kerginleşüvinen bağlı olacaq», dep bildirdi. Almaniya kantsleri yazıhanesiniñ haber etkenine köre, Merkel Yaqın Şarqtaki «problemlerini» muzakere etmege istey, dep bildire Azatlıq Radiosı.
Merkel ve Putin keçken ay Parijde Ukraina şarqındaki vaziyetni al etüv boyunca «normand körüşüvi» çerçivesinde körüşti.
Yaqın Şarqtaki vaziyet İran generalı Kasem Suleymani öldürilgen Amerika ava ücüminden soñ kerginleşti. Böylece, regionda yañı silâlı zıddiyet telükesi peyda oldı. İran quvetleri 176 insan bulunğan Ukraina yolcu uçağını «hata yapıp» tüşürgen soñ vaziyet kene kerginleşti.
