Almaniya kantsleri Angela Merkel video blogunda Almaniyanıñ bütün Avropa Birligi kibi Rusiyeniñ Qırımnı işğal etmesini qabul etilmez dep sayğanını bildirdi, dep yaza Azatlıq Radiosı.
1941 senesi Şuralar Birliginiñ işğali içün ülkeniñ mesüliyetini de hatırlattı. "Bizim, almanlar içün bu, utanç içün bir sebep", – dedi siyasetçi. Muracaat onıñ video blogunda yayınlandı ve Sovet ordusınıñ mevzilerine qarşı vermaht ücüminiñ başlanmasınıñ 80-inci yıldönümine bağışlanğan.
Metinde, o, Rusiye, Ukraina ve Belarusiye topraqlarında ve Baltıq memleketlerinde Ekinci Cian cenki qurbanlarına yazıqsınuv bildirdi. "Millionlarnen qurban ve olarnıñ nesillerine borclu olğanımıznı unutmamalımız", – dedi Merkel.
Muracaatında Rusiye ile Almaniya arasındaki tarihiy bağlar aqqında hatırlattı, ŞSCB-niñ sabıq yolbaşçısı Mihail Gorbaçovğa Almaniyanıñ cenkten soñraki birleşmesindeki emiyeti ve ülkege "uzlaşçma eli" uzatqanı içün teşekkür etti. Amma postsovet alanındaki zemaneviy adiseler aqqında da ayttı.
Hususan, Belarusiye ve Rusiyedeki narazılıqlarnıñ dağıtılması aqqında ayttı ve bu eki memlekette vatandaş cemaatınıñ faaliyeti soñki vaqıtları imkânsız alına kelgenini qayd etti.
İyünniñ 18-nde Almaniya prezidenti Frank-Valter Ştaynmayyer Berlinde Sovet arbiy esirlerine bağışlanğa sergini açtı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
