Belarus prezidenti Aleksandr Lukaşenko, “Olimpıyskıy” stadionında Ukraina prezidenti namzetleri Petro Poroşenko ve Volodımır Zelenskıynıñ resmiy olmağan munaqaşanı meraqnen seyir etken. Bu aqta “Belarus segodnâ” bildire.
“Men başında böyle qonuşma şeklini añlamadım. Amma şimdiki prezidentniñ başqa çaresi de olmağandır. Onı çağırdılar, yoq demege qolaysız. Qorqaq dep sayarlar. Volodâ Zelenskıy bu saada usta. O şoumen, o artist. Ve mında külmege şey yoq. Er bir prezident belli manada bir manada artisttir. Prezidentlerniñ episi halqınıñ ögünde yahşı körünmek istey. Er kes öz halqına dülber, añlayışlı aytmağa istey. Er bir prezident - halqnıñ yüzüdir. Bunıñ içün oña (Volodımır Zelenskıynı - QA) artist olğanını yüzlemek kerekmey. Petro Poroşenkoğa barğanda, tünevin kördiñiz ki: Volodâ Zelenskıydan artta qalmay. O küreşçi, aqiqiy siyasetçi. Bunıñ içün men meraqnen seyir ettim. Men içün bu yañı şekil”, - dedi Lukaşenko.
Munaqaşanıñ neticeleri aqqında aytqanda, Belarus prezidenti, iç bir namzet üstünlik almadı, dep tüşüne.
“Zelenskıy, Poroşenko oña artistiklik, laflar, analizlerde ondan artta qalacaq dep bellese de… Yoq, Poroşenko bunda eñ azından artta qalmağan. Ve açıqtan aytsaq, menimce, Poroşenkoğa atılğan qabaatlavlardan o boşanıp olamağan. Onıñ içün, bellesem, Poroşenko bir şey coymağan, Volodâ Zelenskıy ise qoşma bir şey qazanmağan. Ekisi de olğanınen qaldı. Amma bunıñ esas neticesi, bu eki künde bazarertesi künü yapılacaq saylavnı yahşı etip tüşünmege ve müimligini añlamağa halqnı mecbur ettiler”, - dedi Lukaşenko.
Aprelniñ 19-ında Kyivde “Olimpıyskıy” Milliy Sport Kompleksinde prezident namzetleri Petro Poroşenko ve Volodımır Zelenskıynıñ munaqaşası keçti,
Ukraina prezidenti saylavlarnıñ ekinci basamağı aprelniñ 21-inde keçecek.
Resmiy malümatqa köre, Ukraina prezidenti saylavlarınıñ birinci basamağında Volodımır Zelenskıy içün saylavcılarnıñ 30,24%-ı rey berdi, ameldeki devlet başı Petro Poroşenko içün - 15,95%. Saylavnıñ ekinci turı aprel 21-inde keçirilecek.
