Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov bu sene Keriç köprü yoq etilecek, dep ümüt etkenini bildirdi. Bu aqta o "Biz - Ukrayina" kanalına bergen intervyüsında ayttı.
''Bavovna'' (ukrayin tilinden bavovna pamuq olaraq tercime etile) endi bir yıldan ziyade toqtamay. Baqıñız, daa çoq olacaq da. Çünki bizim sanayımız da dönümini arttırmaqta", - dep ayttı o.
"Oña (Keriç köprüne - QA) yanmağa kerek yoq, o öz yaşayışını toqtatmaq kerek", - dep qoştı Budanov.
Bu sene ola bilemi sualine o, "İnanmaq isteyim" dep cevap berdi.
Bundan da ğayrı, Budanov, Kreml yolbaşçısı Vladimir Putinniñ işğal etilgen yarımadanı Rusiye ile bağlağan köpürniñ yoq etilmesine reaktsiyası nasıl ola bilecegini tarif etti.
''Kimge onıñ nege azır olğanınıñ ya da azır olmağanınıñ meraqlı? Obyektiv kerçek bar... Yazıq ki, er eki taraf içün de yaramay şeyler ola. Şunıñ içün bu vaziyetni dramatikleştirmege kerekmey. Bu pek yaramay ola bile. Bu facia ve anda sarsıntı ola bile, dep aytmaq - bu doğru degil'', - dep fikirini paylaştı o.
2020 senesi açılğan Keriç köprü işğal etilgen Qırımnı Rusiye ile bağlay. Birinci patlav 2022 senesi oktâbrniñ 8-nde, ekincisi - 2023 senesi iyülniñ 17-ne keçken gecesi oldı. Keriç köprüni Rusiye arbiyleri yarımadada yerleşken arbiy birleşmelerni temin etmek içün qullana.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
