Ukraina Devlet sıñır hızmeti koronavirus sebebinden olğan karantinden soñ keçiş noqtalarınıñ işi yañıdan başlağanınen keçken künü işğal etilgen Qırım ve Herson vilâyetiniñ memuriy sıñırından keçkenlerge dair malümatını derc etti. Ukraina sıñırcılarınıñ malümatına köre, yarımadadan çıqqanlar anda kelgenlerden çoq.
«Keçken künü keçiş noqtalarında sıñırcılar 458 insannı qayd etti, 152 vatandan ilhaq etilgen yarımada tarafına ketti, 306 vatandaş ise esas Ukrainağa qayttı», – dep aytıla haberde.
Daa evel Qırım ve Herson vilâyetiniñ memuriy sıñırından keçüv aqqında malümatnı Ukraina İç işler nazirligi derc etti.
İyünniñ 14-15-nden itibaren Ukraina Nazirler şurası iyünniñ 22-ne qadar devam etecek memuriy sıñırdaki keçiş noqtaları işiniñ sıñırlavları lâğu etti.
Ukraina Devlet sıñır hızmeti, koronavirus sebebinden karantinden soñ Qırım ve Herson vilâyetiniñ memuriy sıñırdaki keçiş noqtalarınıñ işi yañıdan başlağan soñ çoq insan qayd etilmey, dep bildirgen edi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
