«Memorial» aq qorçalayıcı merkezi Rusiye siyasiy mabüsleriniñ yañartılğan cedvellerini derc etti. Anda 314 insan bar. 250-si din kütmek ya da diniy mensüplik serbestligi aqqını yerine ketirgeni içün, 64-ü siyasiy sebeplerden apiste yata, dep bildire Azatlıq Radiosı.
Aq qorçalayıcılarnıñ aytqanına köre, cedvellerge kirsetilgen insanlarnıñ cinaiy taqibi siyasiy sebeplernen bağlı ya da qanunsız ola. Bunı tasdıqlağan malümat toplandı ve talil etildi. Bugünki Rusiyede siyasiy sebeplerden azatlıqtan marum etilgen siyasiy mabüsler ve diger insanlarnıñ sayısı qat-qat yüksektir, dep qayd ete aq qorçalayıcılar.
Eki ay evelsi zemaneviy Rusiyeniñ siyasiy mabüsleri cedvelinde 305 soyadı bar edi. Soñki vaqıtları anda «Set» ve «Moskva davası» boyunca bir qaç mabüs kirsetildi.
Diniy sebeplerden azatlıqtan marum etilgen şahıslar cedveline 11 insan qoşuldı. Olarnı Rusiyede terror olaraq tanılıp yasaqlanğan «Hizb ut-Tahrir» teşkilâtında iştirak etkeninde qabaatlaylar.
Bu yıl bir qaç on siyasiy mabüs çeşit sebeplerden azatlıqqa çıqtı. Olarnıñ arasında «Moskva davasınıñ» mabüsleri, ukrainalı arbiy deñizciler, rejissör Oleg Sentsov, çeçen aq qorçalayıcısı Oyub Titiyev bar. İyegova şaatlarınıñ faaliyet davaları boyunca qabaatlanğan on kişiniñ sıñırlav tedbiri azatlıqtan marum etüvnen bağlı olmağanlarğa deñiştirildi.
Aq qorçalayıcılarnıñ qayd etkenine köre, bu sene Rusiyede siyasiy mabüslerniñ sayısı artmağa devam etti.
«Memorial» aq qorçalayıcı merkezi Rusiye akimiyetinden bütün siyasiy mabüslerni azat etmesini talap ete.
