«Memorial» aq qorçalayıcı merkezi Qırımdaki «Hizb ut-Tahrir davalarınıñ» mabüsleri Ayder Capparov, Riza Ömerov, Enver Ömerov, Enver Seytosmanov, Akramjon Abdullayev ve Nematjon İsroilovnı siyasiy mabüs olaraq tanıdı.
Merkezde berilgen malümatqa köre, qırımtatarlar vicdan, din ve birleşme aqlarını zorbalıqsız yerine ketirgenleri içün olarnı siyasiy sebeplerden taqip eteler.
«Açıq faaliyetlerini toqtatsın ve akimiyetni tenqit etmesinler dep olarnı azatlıqtan marum etkenler. Halqara kriteriylerge köre, olar siyasiy mabüs ola. Olarnıñ acele azat etilmesini talap etemiz», – dep aytıla aq qorçalayıcılarnıñ haberinde.
«Memorial» aq qorçalayıcı merkeziniñ siyasiy mabüsler cedvelinde işğal etilgen Qırımnıñ 59 sakini bar.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
