«Memorial» aq qorçalayıcı merkezi Rusiyede terror teşkilâtı olaraq tanılğan ve yasaqlanğan «Hizb ut-Tahrirde» iştirak etkeni içün mahküm etilgen beş qırımtatarını siyasiy mabüs olaraq tanıdı.
Böyle bir malümat iyülniñ 17-nde merkezniñ saytında derc etildi.
Aq qorçalayıcılar Teymur Abdullayev, Uzeir Abdullayev, Rustem İsmailov, Emil Cemadenov ve Ayder Saledinovnıñ tez vaqıtta azat etilmesini talap ete.
«Qırımtatarlar tek musulman teşkilâtınıñ azaları olğanında qabaatlı oldı», – dep qayd ete aq qorçalayıcılar.
«Memorial» «Hizb ut-Tahrirniñ» terror teşkilâtı olaraq ilân etilmesini qanunsız dep saya.
«Rusiye – onı öyle tanığan dünyanıñ yekâne memleketidir. Ukrainada ve çoqusı Avropa memleketlerinde yasaqlanmağan «Hizb ut-Tahrir» davası boyunca Rusiye ilhaq etken Qırımda 2014 senesinden başlap aman-aman 70 insan apiske alındı», – dep aytıla merkezniñ haberinde.
İyünniñ 18-nde Rostov-na-Donunıñ Şimaliy-Kavkaz okrugınıñ arbiy mahkemesi Aqmescitteki «Hizb ut-Tahrir» davasınıñ qararını çıqardı. Beş qırımtatarı 2016 senesi oktâbr ayında evlerinde keçirilgen tintüvlerden soñ tutulğan edi. Olar Rusiyede yasaqlanğan teşkilâtta iştirak etkeninde qabaatlandı.
Devlet qabaatlayıcısı olarnı 11 yıldan 17 yılğa qadar üküm etmege çağırdı. Faqat 17 yıl sert rejimli koloniyada qalmasına üküm etilgen Teymur Abdullayevden ğayrı, er kes prokurornıñ talap etken apis cezalarınıñ ziyadesini aldı. Uzeir Abdullayev 13 yılğa, Emil Cemadenov ve Ayder Saledinov 12 yılğa, Rustem İsmailov ise 14 yılğa azatlıqtan marum etildi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
