Ukrayına prezidenti ofisiniñ yolbaşçı muavini Kırılo Tımoşenko Ukrayına raketa darbelerine oğratıla, dep bildirdi.
«Memleketniñ bir çoq şeerinde darbeler aqqında malümat bar. Açılğan ateş neticesinde vatandaşlar zarar kördi», – dep yazdı o, Telegram kanalında.
Kyivniñ şeer yolbaşçısı Vitaliy Kliçko şeerniñ eki rayonında – Şevçenko ve Solomen rayonlarında obyektlerge ücüm etildi, dep bildirdi. Şeerniñ merkezini uquq qoruyıcılar qapattı.
Kyiv, Hmelnıtskıy, Lviv ve Ternopil vilâyetleriniñ akimiyeti ava mudafaası çalışa, dep bildirdi.
Rusiyeniñ Ukrayınağa qarşı büyük ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine ava darbelerini endire. Moskva vatandaşlarğa ücüm etkenini inkâr ete. Rusiye Ukrayınağa qarşı zapt etüv cenkini alıp barğanını inkâr etip, bunı «mahsus operatsiya» dep adlandıra.
Oktâbrniñ 2-ne qadar BM insan aqları Yuqarı komissarınıñ idaresi Rusiyeniñ büyük ücümi neticesinde 6114 insan ölgenini ve 9132 kişi yaralanğanını tasdıqlap oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
