Rusiye kontrolindeki Qırım Yuqarı mahkemesi Rusiye qurğan Aqmescit Kiyev rayon mahkemesiniñ qırımlı faal Memet Lümanovnı apiske almaq qararına qarşı berilgen istinaf şikâyetini red etti.
Bu aqta advokat Edem Semedlâyev «Qırım birdemligine» ayttı.
Onıñ haber etkenine köre, Memet Lümanov karantin kamerasından umumiy kamerağa alındı. Semedlâyev soy-sopları oña beş mektüp yolladı, amma qırımlı tek bir danesini aldı, dep tarif etti.
Memet Lümanov – faal, mahkeme oturışuvlarına muntazam sürette bara, qırımlı siyasiy mabüslerniñ qorantalarına yardım ete edi. Rusiye uquq qoruyıcıları onı mahküm etilgen dindaşlarına birdemlik köstergeni içün memuriy mesüliyetke çekken edi.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş insannı tuttı, aralarında sabıq imam Remzi Kurtnezirov bar. O, ekinci derece saqatıdır.
Rusiye uquq qoruyıcıları martnıñ 5-nde tutulğan bütün qırımtatarlarnı terror teşkilâtında iştirak etkeninde qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
