Kyivdeki Mustaqillik meydanında oktâbrniñ 1-nde vatandaş jurnalisti, qırımlı bloger Nariman Memedeminovğa qoltutuv aktsiyası keçirilecek. Onı Rusiye uquq qoruyıcıları terrorizmge çağırğanında qabaatlaylar.
«Saat 16:30-da Nariman Memedeminov Rostov-na-Donunıñ Cenübiy okrugınıñ arbiy mahkemesinde soñki sözüni aytacaq. Oturışuv vaqtında advokatlar oña aktsiya aqqında tarif etip, destek sözlerini yetkize bile», – dep aytıla tedbir teşkilâtçılarınıñ haberinde.
Rusiye prokurorı Aleksey Aydinov terrorizmge açıq çağırğanında qabaatlanğan vatandaş jurnalisti Nariman Memedeminov içün altı yıl umumiy rejimli koloniyada qalmasını istedi.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
