Rusiye tarafından işğal etilgen Melitopolde tutıp esir etilgen ukrayin göñüllisi Yaroslav Juk Aqmescit SİZO-sında tutula, o "halqra terrorcılıq eyleminde" qabaatlana. Bunı Rusiyeniñ nezaretinde olğan Qırımnıñ Yuqarı mahkemesi haber ete.
"Mahkeme oturışınıñ neticelerine köre, Qırım Cumhuriyetiniñ Yuqarı mahkemesiniñ istinaf şikâyeti üzre qararı ile Qırım cumhuriyetiñ Aqmescit şeeriniñ Kiyev rayon mahkemesiniñ Ya. Jukqa çıqarğan qarar deñişmez qala", - dep yazıla bildirmede.
Rusiye quvetçileri göñüllini 2022 senesi memuriyet binasınıñ kirişinde terror eylemini yapqanında qabaatlay. O Rusiye Ceza qanunnamesiniñ 361 maddesiniñ birinci qısmına binaen qabaatlana ve 10 ile 20 yıl arasında ya da ömürlik apis cezasına mahküm etile bile.
İyünniñ 18-nde "Tsentr jurnalistskih rassledovaniy" ukrayin agentligi işğal etilgen Mariupolde rusiye quvetçileri eki ukrayin göñüllisi Yaroslav Juk ve İlya Yeninni tutıp esir etkeni aqqında haber etken edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
