İşğal etilgen Melitopolde Rusiye ordusınıñ silâ anbarında patlav oldı, dep haber ete Zaporijjâ vilâyetiniñ arbiy memuriyet yolbaşçısı İvan Fedorov Telegram kanalında.
«Tünevin (martnıñ 7-nde – QA) Melitopolde patladı – vaqtınca işğal etilgen şeerde silâ anbarı ve silâ ketirgen maşina patladı», – dep qayd etti memur yerli sakinlerniñ malümatına esaslanıp.
Bundan ğayrı, onıñ aytqanına köre, «keçken gece (martnıñ 7-nde – QA) patlav Tokmakta, «Kuzneçno-Ştampovoçnı zavod» rayonı yaqınlarında oldı. Fedorovnıñ bildirgenine köre, bu rayonnı Rusiye ordusı arbiy bazağa çevirdi.
Qırım.Aqiqat muarririyet bu malümatnı mustaqil menbalarda teşkerip olamay, çünki Zaporijjâ vilâyetiniñ bir qısmı işğal altında buluna.
Melitopol Rusiyeniñ Ukrayınağa qarşı büyük istilâsı başlağanından Rusiye ordusınıñ işğali altında buluna. 2022 senesi mart ayında Rusiye ordusı şeer yolbaşçısı İvan Fedorovnı hırsızladı, neticede onı deñiştirgenler. O vaqıttan berli Fedorov Ukrayına kontrol etken topraqlarda buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
