Zaporijjâ vilâyetiniñ işğal etilgen Melitopol şeeriniñ merkezinde cuma künü patlav oldı, dep bildirdi şeer yolbaşçısı İvan Fedorov.
«Melitopolniñ merkezinde küçlü bir patlav oldı. Şaatlarnıñ malümatına köre, raşistler qullanğan maşina patlatıldı. Yolcuları ve olarnıñ allarınen bağlı malümat teşkerile», – dep yazdı Fedorov Telegram kanalında.
Zaporijjâ vilâyetiniñ işğalci memuriyet yolbaşçısı Vladimir Rogov Telegram kanalında patlav yerli Gorkiy parkınıñ kirişinde oldı, dep bildirdi.
Cenk vaziyetinde adise yerinden qoşma malümat almaq imkânsız ola.
Rusiye akimiyeti Zaporijjâ vilâyetiniñ Melitopol şeerini fevralniñ 25-nde zapt etti. Serbest yerde bulunğan şeer yolbaşçısı İvan Fedorov şeerdeki patlavlar aqqında muntazam sürette malümat bere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
