Zaporijjâ vilâyetiniñ Melitopol rayonında Rusiyeniñ işğal etilgen Qırımdan esas Ukrainağa silâ taşımaq içün qullanğan demiryol köprü patlatıldı. Bu aqta Odesa vilâyetiniñ arbiy memuriyet spikeri Sergey Bratçuk Telegram kanalında bildirdi.
«Bugün saba saat 8-lerde Melitopol rayonındaki Akimovkada demiryol köprü özüni yoq etti. Bu köpürden işğalciler Qırımdan silâ ve yaqarlıq taşıy edi», – dep aytıla haberde.
Bratçuk, köpür «özüni yoq etken» soñ rusiyeliler «telâşlanıp başladı, çünki añlaylar – olarnı er yerde taparmız».
Patlatılğan köpür aqqında «RİA Melitopol» yerli neşiri de haber etti.
Olarnıñ malümatına köre, patlavdan soñ Rusiye arbiyleri köpürni sarıp aldı. Olar bütün maşinalarnı teşkere, bütün ayaqmaşinacılarnı, yayalarnı teşkere.
Fevralniñ 25-nden berli Melitopol Rusiye Federatsiyasınıñ kontroli altında buluna.
Aprelniñ 28-nde Ukraina akimiyeti Zaporijjâ vilâyetinde Gulâypole yaqınlarında faal uruşlar devam ete, Rusiye ordusı Ukraina mudafaasını keçmege tırışa, dep bildire.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
