Zaporijjâ vilâyetinde Rusiye arbiyleriniñ nezaretine keçken şeerlerniñ ealisi tarafından narazılıq aktsiyaları devam etmekte.
Martnıñ 9-nda Melitopol sakinleri devlet bayraqları ile yürüşke çıqtılar. Aktsiya iştirakçileri şeerniñ merkezi boyu ketip, "Cenkke yoq", "Mında biz ükümetmiz" şiarlarını qıçırdılar. Muvafıq video ve fotolar yerli saytlardan biri tarafından yayınlandı.
Energodarda, martnıñ 9-nda şeer sakinleri Taras Şevçenkonıñ doğğan künü munasebeti ile yerli Medeniyet evi yanında toplıştılar. Şeer başı Dmitriy Orlov öz telegram kanalında yerleştirgen videoda insanlar mitingge devlet bayraqları ile çıqqanı ve Şevçenko abidesine çiçekler qoyğanı körüne.
Narazılıq aktsiyalarını Berdânsk sakinleri de keçire. Yerli meriyanıñ qarşısındaki meydanda keçirilgen mitingden foto da yerli sayt tarafından içtimaiy ağlarda yayınlandı.
Bugün bölgede Energodar, Vasilkov şeerleri ve civarındaki rayonlarınıñ ealisiniñ vilâyet merkezine tahliyesi beklenile. Energodarnıñ şeer başı, tahliye etilgenler ile naqliyat qateri şeerden çıqqanını bildirdi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
