Martnıñ 10-nda saba Rusiye Federatsiyasınıñ arbiy urbasında silâlı insanlar Melitopolde yaşağan Zaporijjâ vilâyet şurasınıñ deputatı Leylâ İbragimovanıñ evini tintip, onı belli olmağan yerge alıp ketti. Bu aqta Meclis azası, «Qırımtatar resurs merkeziniñ» yolbaşçısı Eskender Bariyev bildirdi.
«Bugün Melitopol şeerinde saba 6-da Rusiye arbiy urbasında silâlı insanlar Zaporijjâ vilâyet şurasınıñ deputatı, tamır qırımmtatar halqınıñ vekili, Melitopol şeer ülkeşınaslıq müzeyiniñ müdiri Leylâ İbragimovanıñ evine sürip kirdi. Tintüv keçirildi, cep telefonları alındı. Leylâ İbragimova belli olmağan yerge alıp ketirildi», – dep yazdı Eskender Bariyev.
Leylâ İbragimova hırsızlanğanına dair malümatnı Azatlıq Radiosına vilâyetniñ «Avropa birdemligi» teşkilâtı tasdıqladı, o, onıñ Zaporijjâ vilâyet şurasındaki fraktsiyasına kire.
Hırsızlanğanı aqqında Ukrainanıñ beşinci prezidenti, Avropa birdemliginiñ yolbaşçısı Petro Poroşenko da haber etti. Onıñ malümatına köre, İbragimova evde buluna, amma bağda degil.
Cenk sebebinden muarririyet bu malümatnıñ resmiy tasdıqlanmasını alıp olamay ya da onı mustaqil şekilde teşkerip olamay.
Melitopol Rusiye ordusı tarafından işğal etildi. Buña baqmadan, anda Ukrainağa qoltutuv aktsiyaları keçirile.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
