İşğal etilgen Melitopolde Rusiye memuriyeti uçucı, Sovetler Birliginiñ eki defa qaramanı Amet-Han Sultan soqağına Oktâbrskaya adını bermege qarar aldı. Bu aqta Melitopoldeki Rusiye memuriyetiniñ yolbaşçısı Galina Danilçenko Telegram kanalında bildirdi.
Amet-Han Sultan soqağından ğayrı, işğalci akimiyet Melitopolde daa 54 soqaqqnıñ, 30 aralıq ve 1 meydannıñ adını deñiştirmege qarar berdi.
Fevralniñ 1-nde Qırımda ve esas Ukrayınada ölüminden 52 yıl keçken Amet-Han Sultannı añalar.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (doğma Dağıstandaki Tsovkra-1 avulından), anası – qırımtatarı. Em dağıstanlılar, em qırımtatarlar Amet-Han Sultannı milliy qaramanları dep sayalar.
Amet-Han Sultan 603 cenk uçuşını kerçekleştirip, natsist Almaniyanıñ ava quvetlerine ait 30 uçaqnı şahsen ve 19 danesini taqım erkânında urıp tüşürdi. Uçucı 100 çeşit uçquçnıñ qullanuvını ögrendi, onıñ ücümleri 4237 saatnı teşkil etti.
Amet-Han Sultan Tu-16 adlı uçqan laboratoriyada sınav uçuşını kerçekleştirgende elâk oldı. Moskvadaki Novodeviçye mezarlığında defin etildi.
2015 senesi mayısnıñ 14-nde Ukraina Yuqarı Radası «Aqmescit» ava limanına Amet-Han Sultan adını berdi. Onıñ adını Mahaçkala (Dağıstan, Rusiye) ava limanı da taşımaqta.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
