Qırım mekteplerinde ana-babalar Bilgi kününe bağışlanğan merasimlerge alınmadı, dep haber ete «KrımSOS» aq qorçalayıcı teşkilâtı. Onıñ malümatına köre, oquv yurtlarda polis ve Rusiye gvardiyasınıñ hadimleri bar edi.
«Merasimlerde tek 1-inci ve 11-inci sınıf talebeleri iştirak etti. Qalğan sınıflar «Müim şeyler aqqında» derste edi. Böyle «dersler» vaqtında mektep talebelerine «vatanperverlik terbiyesi aşlana, rus halqınıñ medeniy ve tarihiy birligi, onı saqlamaq müimligi şekillendirile». Bilgenimiz kibi, böyle derslerde Rusiyeniñ Ukrayınağa qarşı cenk lafları da ola», – dep aytıla haberde.
Mektep merasimlerine tek birinci sınıf talebeleriniñ ana-babaları kirsetildi, dep qayd ete «KrımSOS».
«Olğan malümatqa köre, böyle stsenariy işğal etilgen Qırımnıñ çoqusı mektebinde oldı. Bu da işğalci memuriyetten resmiy olmağan emirler kelgenini köstere», – dep qoştı aq qorçalayıcılar.
Rusiye Tasil nazirligi Qırımda sentâbrniñ 1-nden başlap mektep talebeleri arbiy azırlıq kursını keçecek, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
