Saudiy Arabistanda çoq asırlar devamında ilk sefer COVID-19 koronavirus pandemiyası sebebinden akimiyet eki büyük camini – Mekkedeki Mescid-i Haramnı ve Medinedeki Peyğamber Mescidini belli olmağan müddetke qapattı. Daa evel, martnıñ 17-nde, Saudiy akimiyet bütün camilerde ibadetlerniñ qılınmasını yasaqladı. Bu aqta Azatlıq Radiosı bildire.
İlk malümatqa köre, Saudiy Arabistanda 300 insan COVID-19 hastalığına oğradı. Qırallıq bütün çetel vatandaşları, şu cümleden ümrege ketken insanlar içün tış sıñırlarını qapattı.
Dünya boyunca camilerniñ ekseriyeti bugün yañı çeşit virus tarqaluv telükesi bar olğanından qapatıldı. Bazı musulmanlar evleriniñ yanında ya da qapalı camiler yanında ibadet qıla.
