Apiske alınğan Ukraina halq deputatı Viktor Medvedçuk Rusiye prezidenti Vladimir Putin ve Ukraina prezidenti Volodımır Zelenskıyden onı Mariupolnıñ Ukraina imayecilerine ve sakinlerine deñiştirmelerini rica ete. Bu aqta Medvedçuk Ukraina telükesizlik hızmeti derc etken video muracaatında bildirdi.
«Meni Mariupol imayecileri ve anda bulunğan ve gumanitar ayatlardan telükesiz çıqıp olamağan sakinlerine deñiştirmek ricasınen (…) muracaat etmege isteyim», – dep bildirdi Medvedçuk.
Rusiye akimiyeti Medvedçuknıñ ricasına daa cevap bermedi.
Aprelniñ 12-nde aqşam Ukraina prezidenti Volodımır Zelenskıy «Opozıtsiyna platforma – za jıttâ» firqasınıñ sabıq reisdeşi, halq deputatı Viktor Medvedçuk yaqalandı, dep bildirdi. O, Rusiye Ukrainağa ücüm etken soñ, ev apsinden qaçqan edi.
Neticede Zelenskıy Medvedçuknı esir tüşken ukrainalılarğa deñiştirmege teklif etti.
Rusiye prezidentiniñ spikeri Dmitriy Peskov böyle bir deñişüv imkânını izaatlap, «Medvedçuk Rusiye vatandaşı degil», amma aynı vaqıtta Rusiye «Medvedçuknıñ vaziyetini taqip etecek» ve «Avropa siyasetçilerini buña çağıra», dep qayd etti.
Mariupolde Rusiye ordusı tarafından sarıp alınğan Ukraina arbiyleri Rusiye Mudafaa nazirliginiñ silânı taşlap, esirlikke teslim olmaq teklifine razı olmadı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
