Rusiyeniñ sabıq baş naziri Dmitriy Medvedev Pervıy Rusiye kanalına intervyü berip, Qırım işğalinden soñ Rusiyege qarşı kirsetilgen dünya sanktsiyaları «iqtisadiyatqa bayağı zarar ketirdi» dedi, dep bildire «İnterfaks» Rusiye haber agentligi.
«Qırım qoşulğan soñ, Qırım memleketimizge qaytqan soñ, sanktsiyalar keldi. Bu, tabiiy ki, iqtisadiyatqa bayağı zarar ketirdi, ve biz tek qıyın sanktsion ve buhran şahaitlerinde işni teşkil etmek degil… ükümet daa evel oğraşmağan müim mevzunen oğraşmağa mecbur oldı – bir sıra mal çeşiti memleketimizden uzaqlaştırıldı, italât yerine yerli mallarnı qullanuv meselesi çıqtı», – dep bildire Medvedevniñ aytqanlarını kütleviy haber vastası.
2019 senesi sentâbrniñ 12-nde Avropa Birliginiñ Şurası Ukraina topraq bütünligi, suvereniteti ve mustaqilliginiñ bozulmasınen bağlı şahsiy sanktsiyalarnı daa yarım yılğa – 2020 senesi martnıñ 15-ne qadar uzattı. Sanktsiyalar cedvelinde – 170 Rusiye ve Ukraina vatandaşı ve 44 şirket. Sanktsiyalar insanlarnıñ aktivlerini buzlatıp, olarnıñ Avropa Birligi kirişlerini yasaqlay.
Sanktsiyalar 2014 senesi Qırım işğalinden soñ kirsetildi, soñra Rusiyeniñ Ukraina şarqında aydutlarğa yardım etkeni olarnı bir qaç kere quvetleştirgen ediler. O vaqıttan berli sıñırlav tedbirleri bir qaç kere uzatıldı. Sanktsion cedvelde – bir sıra Rusiye devlet erbabı, memur, arbiy yolbaşçılar ve kontrol etilgen Donbas topraqlarında Rusiye qoltutqan aydutlarnıñ reberleri.
Şimdi Rusiyege qarşı Avropa Birliginiñ daa eki büyük sanktsion paketi bar ve ara-sıra uzatıla: sektoral iqtisadiy sanktsiyalar (2020 senesi yanvarniñ 30-na qadar olacaq) ve yarımada işğali ve qanunsız ilhaqına cevap olaraq kirsetilgen «Qırım» sanktsiyaları (2020 senesi iyünniñ 23-ne qadar olacaq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
