Rusiye Telükesizlik Şurasınıñ reisi Dmitriy Medvedev Ukrainada Rusiye prezidentiniñ kumı, Rusiye tarafdarı siyasetçi Viktor Medvedçuknıñ yaqalanğanını izaatladı.
«Özüni «Ukraina akimiyeti» dep adlandırğan bazı nişaretler Viktor Medvedçuknıñ şaatlığını almağa, onı «tez ve adaletli bir şekilde» mahküm eetmege, soñra esirlerge deñişmege isteyler, dep bildire. Bular etrafına diqqatnen baqsın ve gece qapularnı yahşı kilitlesin, yoqsa özleri deñişecek şahıslar ola bile», – dep yazdı Medvedev Telegram kanalında.
Aprelniñ 12-nde aqşam Ukraina prezidenti Volodımır Zelenskıy «Opozıtsiyna platforma – za jıttâ» firqasınıñ sabıq reisdeşi, halq deputatı Viktor Medvedçuk yaqalandı, dep bildirdi.
Soñra Rusiye prezidentiniñ kumını esir tüşken ukrainalılarğa deñiştirmege teklif etti.
Rusiye Medvedçuk yaqalanğanını izaatlamağan edi. Rusiye prezidenti Vladimir Putinniñ vekili Dmitriy Peskov bu haber teşkerilecek, dep bildirdi.
«Bir tasdıqlav olmağanda bir şey aytmaq doğru olmaz», – dep yazdı Peskov aprelniñ 12-nde aqşam.
2021 senesi mayıs ayından berli Medvedçuk devlet hainligi ve milliy resurslarnı hırsızlav şübhesinen gece-kündüz ev apsinde buluna edi. 2021 senesi oktâbr ayında devlet hainligi ve terror teşkilâtınıñ faaliyetine yardım etüv şübhesi aydınlatıldı. Rusiyeniñ büyük ücüminden bir qaç kün ögüne Medvedçuknıñ ömür arqadaşı Oksana Marçenko Beyazrusiyege ketti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
