Ukrayınadaki cenkke seferber etilgen rusiyelilerniñ sayısı akimiyet aytqan 300 biñden çoq olıp, yarım million qadar ola bile. Bu aqta «Mediazona» keçken sene küzde celpname alıp acele toy yapqanlarnıñ sayısına dair tedqiqat malümatına esaslanıp yaza.
Evliliklerni qayd etüv malümatları seferber etilgenlerniñ sayısını tahmin etmege imkân berdi – neşir 527 biñ insan raqamını bere.
Rusiyede bıltır sentâbrniñ 21-nde qısmiy seferberlik ilân etilgen soñ celpname alğan erkeklerge tez evlenmege izin berildi – bir ay beklemeyip.
«Uzun vaqıt beraber yaşap, evlenmegen seferber etilgenler bundan faydalandı», – dep yaza «Mediazona». Neşir qayd etkenine köre, ömür arqadaşları aqayları aqqında malümat ala bile, cebede elâk olsalar, tazminat ala bilecek.
Oktâbrniñ soñunda seferberlik boyunca askerlikke aluv yekünlendi, amma bir künde evlenüv devam ete. Saratov vilâyetinde dekabr ayında, yani seferberlik bitkeni ilân etilgeninden bir aydan soñ seferber etilgenlerniñ 117 toyu qayd etildi, Omsk vilâyetinde olarnıñ sayısı 89 edi.
«Mediazona», keçken senege baqqanda 2022 senesi evlengenlerniñ sayısı birden artqanını köstergen Rosstat malümatına da esaslana. Noyabr ayında olarnıñ sayısı bir yıl evelsi olğanından 45 biñ çoq edi, dekabr ayında ise – 16 biñ. Neşirniñ qayd etkenine köre, tek seferber etilgenler aqqında aytılmay.
«Mediazona» 50 regionnıñ malümatı esasında seferber etilgenlerniñ tahminiy sayısını esapladı, anda celpname alğan aman-aman 25 biñ erkek evlendi. Askerlikke alına bilgen yaşta erkeklerniñ sayısına dair malümatqa esaslanıp, «Mediazona» bu regionlarda tahminen 240 biñ insan, umumen Rusiyede tahminen 525 biñ erkek seferber etildi, dep hulâsa çıqara.
Kreml yolbaşçısı Vladimir Putin ve diger Rusiye reberleri 300 biñ insan askerlikke alındı, daa tahminen 20 biñ kişi göñülli olaraq orduğa qoşuldı, dep bildirgen ediler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
