Qırımtatar Milliy Meclisiniñ ofisinde Ukrainada keçirilgen merkezsizleştirüv çerçivesinde Qırımnıñ memuriy islâatı muzakere etile. Bu aqta Meclis reisi Refat Çubarov Facebookta bildirdi.
«Birleşken territorial cemiyetler – yerli idareniñ temel dereceli organlarınıñ – qurulması Qırım işğali bitkeninen başlanacaqtır», – dep yazdı Çubarov.
O, Qırımtatar Milliy Meclisi, Ukraina halq deputatları ve Ukraina prezidentiniñ Qırım Muhtar Cumhuriyetindeki daimiy temsilciliginiñ işini «Ukraina Yuqarı Radasınıñ qararında pekitilgenini körecekmiz», dep ümüt etkenini bildirdi.
2019 senesi dekabrniñ 13-nde prezident Volodımır Zelenskıy Yuqarı Radağa Anayasanıñ akimiyetniñ merkezsizleştirilüvinen bağlı deñişüvleri kirsetilgenine dair qanun leyhasını kirsetti. Prezident «rayon» ıstılasını yoq etip, yerine «okrugnı» kirsetmege ve devlet memuriyetleri yerine prefektler institutını kirsetmege teklif etken edi; belli memuriy-territorial birlemler olmasını da teklif etti: cemiyet, okrug, vilâyet, Qırım Muhtar Cumhuriyeti. Daa soñra Zelenskıy leyhanı keri aldı.
Fevralniñ 25-nde «Sluğa narodu» («Halq hızmetçisi») firqasınıñ teşebbüsinen Ukrainada merkesizleştirüv islâatınıñ devamı muzakere etilip başladı. Kyivde birinci etapta parlament fraktsiyalarınıñ vekilleri, çetel diplomatları, territorial cemiyet ve birleşmeleriniñ temsilcileri munaqaşağa qoşuldı.
Regionlar seviyesinde de muzakereler oldı.
Neticeleri Ukraina Anayasasınıñ merkesizleştirüv deñişmeleriniñ temelinde olmalı.
Mayısnıñ başında Ukrainanıñ cemiyet ve territoriyalar inkişafı nazirligi Qırım Muhtar Cumhuriyeti ve Aqyar şeeriniñ merkesizleştirüviniñ başlanğıç planını taqdim etti.
Mayısnıñ soñunda Ukraina baş naziri Denıs Şmığal bildirdi ki, işğal etilgen Qırımnıñ cemiyet territoriyalarınıñ şekillendirüv planı «onıñ Ukraina kontroline qaytmasından soñ» tasdıqlanacaq.
