Dekabrniñ 9-nda Kyivdeki Qırımtatar Milliy Meclisiniñ ofisinde Frenkistannıñ Ukraina elçisi Etienne de Poncins ile körüşüv ötkerildi.
Bu aqta körüşüvde olğan Meclis reisi Refat Çubarov Facebook saifesinde haber etti.
Elçinen qırımtatar halqınıñ lideri Mustafa Cemilev, Meclis reisiniñ muavini İlmi Umerov, Meclis azaları Eskender Bariyev, Gayana Yüksel ve Riza Şevkiyev iştirak ettiler.
«Subet vaqtında taraflar vaqtınca işğal etilgen Qırımda insan aqlarınıñ vaziyeti, sıñırlanğan söz serbestligi, qırımtatar faalleri ve qorantalarınıñ zulumı ve taqip etilüvinen bağlı fikirlerini paylaştı. Ukrainalı siyasiy mabüslerniñ azat etilüvi, Ukraina topraq bütünliginiñ halqara seviyede tanılğan sıñırlarda, Qırımnen beraber, ğayrıdan tiklenmesi yolunda atıla bilecek adımlar muzakere etildi», – dep bildirdi Çubarov.
Körüşüvde Mustafa Cemilev Ukraina meselesinde halqara muzakerelerniñ semereli formatını qıdıruv ve qullanuv müim olğanını qayd etti. O, Qırım ve Donbasnı işğalden qurtaruv meselesini muzakere etmek içün yekâne halqara meydançıqnı quruv imkânı aqqında ayttı.
«Qırımtatar halqınıñ vekilleri samimiy müitte keçirilgen subet vaqtında Frenkistan elçisi Etienne de Poncins beyge Qırımğa doğru yapılacaq yürüşniñ qavrayışı aqqında tarif etti, bunıñnen bağlı matbuat risalesini berdi ve zemaneviy Frenkistan siyasetçileri er daim insan aqlarınıñ qorçalanması, dünyadaki nizam ve siyasiy istiqrarnıñ saqlap qalmasınıñ tarafdarı olğan seleflerine lâyıq olacağına ümüt etkenini bildirdi», – dep aytıla haberde.
Dekabrniñ 6-nda Kyivdeki matbuat konferentsiyasında Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti.
Meclis reisiniñ aytqanına köre, teşkilâtçılar bir sıra memleket ve halqara teşkilâtlarğa muracaat etip, yürüşte iştirak etmelerine davet etecek ola. Çubarov, erkânı belli mesleatlardan soñ aydınlatılacaq ştab endi quruldı. Aktsiyanıñ künü ise daa soñra belli olacaq, çünki azırlıq «bir ya da eki aydan çoñ» devam ete bile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
