Dekabrniñ 17-nde Aqmescitte olıp keçken "qırımtatarlarnıñ qurultayı" qırımtatar halqı Meclisiniñ Qırım içinde ve Türkiyede tesirini zayıflatmaq ıntıluvıdır. Bu aqta Qırım.Aqiqatqa #LiberateCrimea halqara cemaat kampaniyasında bildirdiler.
Faallerniñ qayd etkenine köre, Meclisniñ muvafaqiyetli faaliyeti ve Qırımnıñ qırımtatar ealisi arasında yüksek itibarı tek yarımadanıñ Rusiye akimiyetini degil, Kremlni de qasevetlendire.
"Rusiye akimiyeti halqara demokratik toplulıqta qırımtatar halqı Meclisini itibardan tüşürmek imkânsız olğanını añlay, şunıñ içün bu qurultay — Rusiye akimiyeti ve qırımtatar işbirlikçileriniñ Qırımdaki qırımtatarlar arasında Meclisniñ tesirini eksiltmek ve aynı zamanda Türkiye akimiyetine muracaat etip, Mecliske olğan qol tutuvını zayıflatmaq ıntıluvıdır. Amma bu ıntıluv, evelki ıntıluvlar kibi, neticeler bermeycek. Bu kibi qurultaylar endi çoq oldı, amma qırımtatarlar Mecliske qoltutmağa devam eteler. Ve Türkiye akimiyeti, şübesiz ki, Meclisni, qırımtatarlarnıñ qanuniy temsil organı olaraq, desteklemege devam etecek", — dep qayd ettiler faaller.
Dekabrniñ 17-nde Fevzi Yakubov adına Qırım müendislik-pedagogika universitetinde qırımtatarlardan saylanğan Qırımnıñ çeşit seviyedeki deputatlarınıñ qurultayı olıp keçti. Rusiye kütleviy haber vastalarınıñ malümatına köre, tedbirde 400 insan iştirak etti.
Qurultay iştirakçileri "bu tedbirni qırımtatar halqınıñ fikrini bildirmek aqqı olğan yekâne qanuniy organ olaraq belgilediler" ve Türkiye prezidentini "Qırımnı ziyaret etip, soñki on yıl içinde yüz bergen müsbet deñişmelerni qayd etmege" davet ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
