Qırımtatar Milliy Meclisi, Ukraina prezidenti Volodımır Zelenskıyğa Ukraina Anayasasına qırımtatar muhtariyeti aqında qanun leyhasını Yiqarı Radağa kirsetmege muracaat etti. Bunıñ aqqında Meclis reisi Refat Çubarov, derc etken beyanatta aytıla.
"Ukraina Anayasasınıñ "Qırım Muhtar Cumhuriyeti" X bölünine deñişmelerniñ kirsetüvi aqqında", "Qırımtatar halqınıñ statusı aqqında", "Ukraina tamır halqları aqqında" Anayasa komissiyası azırlağan qanun leyhalarını, uzatmadan Ukraina Yuqarı Radasına kirsetmege Ukraina prezidentini çağırtamız", - denile Meclis beyanatınıñ metninde.
Mecliste, qırımtatar halqınıñ razılığı olmadan, Qırım statusınıñ tayinlenmesi yapılmamaq kerek, dep qayd ettiler.
Oktâbr 10-unda Ukraina prezidenti Volodımır Zelenskıy, qırımtatar muhtariyeti Qırımnıñ işğalden qurtaruv meselesini qolaylaşıracağında emin olmağanını ayttı.
Qırımtatar Milliy Meclisi IX çağırılış Yuqarı Rada deputatlarını Ukraina Anayasasınıñ «Qırım Muhtar Cumhuriyeti» X maddesine deñişmeler kirsetmesine çağırdı.
Ukraina haber siyaseti naziriniñ birinci muavini Emine Ceppar qırımtatar muhtariyetiniñ «separatizmge iç bir alâqası yoq» dep añlatqan edi. Onıñ qurulması ise Ukrainanıñ 2014 senesi qoşulğan BM tamır halqlarnıñ aqlarına dair beyannamesinde qayd etilgen tamır halqnıñ aqqı ola.
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil olmaqta.
